দেশত কোৰোণাৰ দ্বিতীয় ঢৌ, আকৌ বিধ্বস্ত হ’ব নেকি কাজিৰঙাৰ পৰ্যটন উদ্যোগ!

পুনৰ আতংকৰ সৃষ্টি কৰিছে কোৰোণা ভাইৰাছে৷ কোৰোণাৰ সংক্ৰমণ বৃদ্ধি পোৱাৰ পিছতে পৰ্যটন ক্ষেত্ৰ কাজিৰঙাত বিগত বৰ্ষৰ দৰে পানীত হাঁহ নচৰা অৱস্থাৰ সৃষ্টি হোৱাৰ আশংকাত দিন কটাইছে কাজিৰঙাৰ পৰ্যটন ব্যৱসায়ীৰ লগতে পৰ্যটনৰ লগত জড়িত ব্যক্তিগত প্ৰতিষ্ঠানসমূহৰ কৰ্মচাৰীসকলে।

বিগত বৰ্ষত কোৰোণা ভাইৰাছৰ প্ৰাদুৰ্ভাৱৰ ফলত পৰ্যটকৰ বাবে আধাতে বন্ধ কৰি দিয়া হৈছিল কাজিৰঙা ৰাষ্ট্ৰীয় উদ্যান। যাৰ ফলত কাজিৰঙা ৰাষ্ট্ৰীয় উদ্যানৰ জীপ ছাফাৰী, হাতী ছাফাৰী আৰু ব্যক্তিগত হোটেল ব্যৱসায়ী তীব্ৰ সংকটৰ মুখামুখি হৈছিল। আনকি একাংশ  ব্যক্তিগত অতিথিশালাত কৰ্মৰত যুৱক–যুৱতীক পৰিতোষিক দিব নোৱাৰি কামৰ পৰা চাটাই কৰিছিল কৰ্তৃপক্ষই।

পৰৱৰ্তী সময়ত ক্ৰমাৎ কোৰোণাৰ ভয়াৱহতা কমাত পুনৰ জীৱিকাৰ পথ সূচল হৈছিল বহু নিবনুৱা যুৱক–যুৱতীৰ। কিন্তু আকৌ কোৰোণাৰ দ্বিতীয় ঢৌৱে সমগ্ৰ দেশত আতংকৰ সৃষ্টি কৰাত চিন্তাত পৰিছে কাজিৰঙাত পৰ্যটনৰ লগত জড়িত লোকসকল। কাজিৰঙাত জীপ ছাফাৰীৰ জৰিয়তে পৰিয়াল পোহপাল দি আহিছে প্ৰায় পাঁচ শতাধিক নিবনুৱা যুৱকে। লগতে, কাজিৰঙাৰ  অঞ্চলত থকা প্ৰায় ৯০ খনতকৈ অধিক ব্যক্তিগত হোটেলত কৰ্মৰত আছে কাজিৰঙাৰ সহস্ৰাধিক যুৱক–যুৱতী। কাজিৰঙাৰ দাঁতিকাষৰীয়া অধিকাংশ লোকেই কাজিৰঙাৰ পৰ্যটনৰ লগত জড়িত।

ইতিমধ্যে কোৰোণা মহামাৰীৰ ফলত বহু অতিথিশালাত বুকিং কেঞ্চেল কৰিছে পৰ্যটকসকলে। এপ্ৰিল, মে’ মাহত সততে কাজিৰঙালৈ আগমন ঘটে বহিঃৰাজ্যৰ পৰ্যটকৰ। বিশেকৈ বহিঃৰাজ্যৰ পৰ্যটকে বহু হোটেল বুকিং কেঞ্চেল কৰিছে বুলি জানিব পৰা গৈছে। যিহেতু কাজিৰঙাৰ পৰ্যটন ব্যৱসায়ীসকলে বছৰটোত আঠ মাহ ব্যৱসায় কৰি বাকী চাৰি মাহ বিনা উপাৰ্জনৰে চলিব লগা হয়। সেয়েহে এতিয়া সকলোৰে চিন্তা কাজিৰঙা ৰাষ্ট্ৰীয় উদ্যান পৰ্যটকৰ বাবে আনুষ্ঠানিকভাৱে বন্ধ হবলৈ প্ৰায় দেৰমাহ সময় থকা অৱস্থাত কোৰোণাৰ ফলত স্তব্ধ হৈ পৰিব নেকি পৰ্যটন ব্যৱসায়।

চৰকাৰক এতিয়া পৰ্যটন ব্যৱসায়ীৰ আহ্বান, সময় উপযোগী ব্যৱস্থালৈ পৰ্যটক অহাৰ ব্যৱস্থা কৰি কাজিৰঙাৰ পৰ্যটন ব্যৱসায়ীসকলক উপকৃত কৰক। আনহাতে, কাজিৰঙা ৰাষ্ট্ৰীয় উদ্যান কৰ্তৃপক্ষয়ো বিষয়টোক লৈ উদ্বিগ্নতা প্ৰকাশ কৰিছে। বিগত বৰ্ষ সমূহৰ দৰে এইবাৰ কাজিৰঙাত বিদেশী পৰ্যটক নাই। চলিত পৰ্যটন বৰ্ষত দেশীয় পৰ্যটকৰ সংখ্যা পূৰ্বৰ তুলনাত বেছি যদিও বিদেশী পৰ্যটক কাজিৰঙালৈ নহাৰ বাবে সংগৃহীত ৰাজহৰ পৰিমাণ কম। সেয়েহে আগতীয়াকৈ কাজিৰঙা ৰাষ্ট্ৰীয় উদ্যান বন্ধ হ’লে লোকচানৰ সন্মুখীন হ’ব পাৰে বুলি জানিবলৈ উদ্যানৰ সঞ্চালক পি শিৱ কুমাৰে।