যোৰহাটবাসী ৰাইজে সম্প্ৰতি উপভোগ কৰিবলৈ নাপাব জুবিন, পাপনৰ সংগীতানুষ্ঠান!

যোৰহাটত দুখনকৈ আগশাৰীৰ বিহু সন্মিলনৰ নিশাৰ সাংস্কৃতিক অনুষ্ঠান বাতিল কৰা হৈছে । যোৰহাট কেন্দ্ৰীয় ৰঙালী বিহু সন্মিলনখন বৰ্তমান অনুষ্ঠিত নকৰিবলৈ সিদ্ধান্ত লোৱাৰ পিছত যোৰহাটৰ আন এখন আগশাৰীৰ বিহু সন্মিলন পশ্চিম যোৰহাট কেন্দ্ৰীয় ৰঙালী বিহু সন্মিলনৰ উদ্যোক্তাসকলে নিশাৰ সাংস্কৃতিক অনুষ্ঠান বাতিল কৰিছে । যোৰহাট কেন্দ্ৰীয় ৰঙালী বিহু সন্মিলনত দীক্ষু আৰু জুবিন গাৰ্গে অনুষ্ঠান পৰিৱেশন কৰাৰ কথা আছিল আৰু কেন্দ্ৰীয় ৰঙালী বিহু সন্মিলন পশ্চিম যোৰহাটত অনুষ্ঠান পৰিৱেশন কৰিলেহেতেন অঙ্গৰাগ পাপন মহন্তই ।

দৰাচলতে ক'ৰোনাৰ ভয়াৱহ পৰিস্থিতিৰ মাজত অহা ২২, ২৩ এপ্ৰিলৰ নিশা অনুষ্ঠিত হ'ব লগা জনপ্ৰিয় শিল্পী দীক্ষু আৰু জুবিন গাৰ্গৰ সঙ্গীতানুষ্ঠানক লৈ বিমোৰত পৰে যোৰহাট কেন্দ্ৰীয় ৰঙালী বিহু সন্মিলনৰ উদ্যোক্তাসকল । নিশা ১১ বজাৰ পূৰ্বে অনুষ্ঠান সামৰিলেও দৰ্শকৰ ভিৰ নিয়ন্ত্ৰণ কৰা তথা বাকী কভিড প্ৰট'কলসমূহ মানি চলাৰ ক্ষেত্ৰত নিশ্চিত হ'ব নোৱাৰিলে উদ্যোক্তাসকল । সেয়েহে এই বিহু সন্মিলনখন বাতিল কৰে উদ্যোক্তাসকলে । কিন্তু ক'ভিড পৰিস্থিতি শাম কটাৰ পিছত যোৰহাটবাসীৰ বাবে এই বিহু সন্মিলনৰ উদ্যোক্তাসকলে জুবিন গাৰ্গৰ বিশেষ সাংস্কৃতিক সন্ধিয়া অনুস্থিত কৰিব বুলি জানিবলৈ দিছে ‌।

" দেশৰ বিভিন্ন ৰাজ্যত সংহাৰী ৰূপ ধাৰণ কৰা ক'ভিড সংক্ৰমণৰ কথা চিন্তা কৰিয়েই আমি বৰ্তমান বিহু সন্মিলনখন বাতিল কৰিবলৈ সিদ্ধান্ত লৈছো । পৰিস্থিতি স্বাভাৱিক হোৱাৰ পিছত আমি জুবিন গাৰ্গৰ বিশেষ সাংস্কৃতিক সন্ধিয়া অনুষ্ঠিত কৰিম । " যোৰহাট কেন্দ্ৰীয় ৰঙালী বিহু সন্মিলনৰ সভাপতি কামাখ্যা মোহন দাসে এনেদৰে কয় ।

পশ্চিম যোৰহাট ক্ৰীড়া সন্থাৰ খেলপথাৰত অহা ৯মে'ত অনুষ্ঠিত হব লগা ৰঙালী বিহু সন্মিলনৰ নিশাৰ সাংস্কৃতিক অনুষ্ঠানৰ বাবে উদ্যোক্তাসকলে জনপ্ৰিয় কন্ঠশিল্পী অঙ্গৰাগ পাপন মহন্তৰ সৈতে যোগাযোগ কৰিছিল যদিও শেষ মুহূৰ্তত বাতিল কৰে নিশাৰ সাংস্কৃতিক অনুষ্ঠান । ক'ভিড পৰিস্থিতিৰ প্ৰতি দৃষ্টি ৰাখি তথা ক'ভিড প্ৰট'কলসমূহ মানি জনপ্ৰিয় শিল্পীৰ সাংস্কৃতিক অনুষ্ঠান অনুষ্ঠিত কৰাত থকা বহু অসুবিধাৰ বাবে এই অনুষ্ঠান বাতিল কৰা হৈছে বুলি জানিবলৈ দিছে উদ্যোক্তাসকলে । ইয়াৰ বিপৰীতে এই বিহু সন্মিলন অনুষ্ঠিত হ'ব বিহুৰ লগতে অসমৰ বহুকেইটা জনগোষ্ঠীৰ শিল্পীসকলৰ অংশগ্ৰহণেৰে অনুষ্ঠিত হ'ব লগা মুকলি বিহুৰে ।

" ক'ভিড প্ৰট'কলৰ মাজেৰে পাপনৰ দৰে জনপ্ৰিয় শিল্পীৰ অনুষ্ঠান অনুষ্ঠিত কৰাত বহু অসুবিধা আছে । সেয়েহে আমি এইবাৰ হুচৰি বিহুৰ লগতে অসমৰ বহুকেইটা জনগোষ্ঠীৰ নৃত্য প্ৰদৰ্শনেৰে ক'ভিড প্ৰট'কল মানি মুকলি বিহু অনুষ্ঠিত কৰিম । ", পশ্চিম যোৰহাট ক্ৰীড়া সন্থাৰ সভাপতি ৰবীন শইকীয়াই এনেদৰে কয় ।

অসমৰ বিভিন্ন স্থানত বিহু সন্মিলনসমূহ ক্ৰমাৎ অনুষ্ঠিত হবলৈ লওতেই ক'ভিডৰ আগ্ৰাসনক লৈ যাতে হৃদয় বিদাৰক পৰিস্থিতিৰ সৃষ্টি নহয় বৰ্তমান তাক লৈ সচকিত হৈ পৰিছে বহু লোক ।